ქალის ჯანმრთელობა

მიუხედავად იმისა, რომ ქალები, როგორც წესი, უფრო ჯანსაღ და დაბალანსებულ კვებას ირჩევენ, ვიდრე მამაკაცები, გარკვეული საკვები ნივთიერებების მიღება მაინც არასაკმარისად ხდება.
რობერტ კოხის ინსტიტუტის მიერ ჩატარებული DEGS1 კვლევის მიხედვით, ქალების მხოლოდ 15% და მამაკაცების 7% აკმაყოფილებს გერმანიის ნუტრიციოლოგების რეკომენდაციებს.

მაგალითად, რკინის დეფიციტი ქალებში უფრო ხშირია, რადგან  მენსტრუაციის დროს რკინის დანაკარგი დიდია. მსგავსი ტენდენცია შეინიშნება კალციუმის შემთხვევაშიც - მისი მიწოდება ზოგჯერ არასაკმარისია ორსულობისა და მენოპაუზის დროს, რაც ორგანიზმში კალციუმის შეწოვის დაქვეითებითაა განპირობებული.

რკინა - აუცილებელი მიკროელემენტი ქალებისთვის

aრკინა ერთ-ერთი უმნიშვნელოვანესი მიკროელემენტია ქალის ორგანიზმისთვის. ყოველდღიურად მისი საკმარისი რაოდენობით მიღება აუცილებელია, რადგან რკინა ასრულებს მრავალ მნიშვნელოვან ფუნქციას ორგანიზმში. ის ხელს უწყობს სისხლის წითელი უჯრედების და ჰემოგლობინის წარმოქმნას, რაც უზრუნველყოფს ჟანგბადის ეფექტურ ტრანსპორტს სისხლში.
გარდა ამისა, რკინა მნიშვნელოვან როლს ასრულებს ენერგიის წარმოებასა და უჯრედების ბუნებრივ განახლებაში, რაც განაპირობებს ენერგიულობას და საერთო კეთილდღეობას.

მენსტრუაციის დროს ქალის ორგანიზმი კარგავს სასიცოცხლოდ მნიშვნელოვან რკინის რაოდენობას. ძლიერი მენსტრუალური სისხლდენის შემთხვევაში რკინის დანაკარგი შეიძლება აღემატებოდეს მიღებულ რაოდენობას, რადგან მხოლოდ 1 მლ სისხლი შეიცავს დაახლოებით 0.5 მგ რკინას. სწორედ ამიტომ, ქალებში რეკომენდებულია უფრო მაღალი, დაახლოებით 15 მგ რკინის დღიური მიღება, მაშინ როცა მამაკაცებისთვის ნორმა 10 მგ-ია.

ორსულობის პერიოდში რკინაზე მოთხოვნილება მნიშვნელოვნად იზრდება, რადგან ნაყოფსაც სჭირდება ეს მიკროელემენტი სისხლისა და შინაგანი ორგანოების განვითარებისთვის. გარდა ამისა, ორსულობისას ქალის სისხლის მოცულობა მატულობს მზარდი საშვილოსნოსა და პლაცენტის უკეთესი სისხლის მიმოქცევის უზრუნველსაყოფად. ამ პერიოდში ორგანიზმს დღიურად დაახლოებით 20–30 მგ რკინა ესაჭიროება. მაღალი რჩება მოთხოვნილება ლაქტაციის დროსაც, რადგან მეძუძურმა დედამ ახალშობილს ეს მნიშვნელოვანი ელემენტი დედის რძის საშუალებით უნდა მიაწოდოს.

ჩვენი რჩევა: ეცადეთ უფრო ხშირად მიირთვათ ხორცი, რადგან ცხოველური წარმოშობის რკინა უკეთესად შეიწოვება ადამიანის საჭმლის მომნელებელი ტრაქტის მიერ, ვიდრე მცენარეული წარმოშობის რკინა. თუმცა, პარკოსნები, ბოსტნეული და მარცვლეულის პროდუქტებიც რკინის მნიშვნელოვანი წყაროებია.
თუ ამ პროდუქტებს C ვიტამინით მდიდარ საკვებთან - მაგალითად, ფორთოხლის წვენთან ან ახალ ბოსტნეულთან - ერთად მიიღებთ, ეს მნიშვნელოვნად გააუმჯობესებს მცენარეული წარმოშობის რკინის ათვისებას.

კალციუმი - განსაკუთრებით მნიშვნელოვანი მინერალი ორსულობისა და მენოპაუზის პერიოდში

ბუნებრივია, კალციუმი აუცილებელია არა მხოლოდ ქალებისთვის, არამედ მამაკაცებისთვისაც. ეს მინერალი ძვლებისა და კბილების მთავარი შემადგენელია - სწორედ აქ არის კონცენტრირებული ორგანიზმში კალციუმის მთლიანი რაოდენობის დაახლოებით 99%.
კალციუმი ხელს უწყობს: ძვლებისა და კბილების ნორმალური მდგომარეობის შენარჩუნებას, სისხლის შედედებას, კუნთების და ნერვული სისტემის ჯანსაღ ფუნქციონირებას.
ჩვენი ძვლოვანი ქსოვილი მუდმივად განახლების პროცესშია - ძველი უჯრედები იშლება, ახალი კი წარმოიქმნება. როცა ორგანიზმს საკმარისი კალციუმი არ მიეწოდება, ის იძულებულია ეს ელემენტი  გამოყოს ძვლებიდან. რადგან სხეული თავად ვერ გამოიმუშავებს კალციუმს, აუცილებელია მისი მიღება საკვებიდან ან საკვები დანამატებიდან.
კალციუმის ყველაზე ცნობილი წყაროა რძე და რძის პროდუქტები, თუმცა ის გვხვდება მცენარეულ პროდუქტებშიც - მაგალითად, ბროკოლში, ნუშსა და სხვა თხილეულში.
საშუალოდ, კალციუმის რეკომენდებული დღიური დოზა 1000 მგ-ია.
ფაქტია, რომ ქალებს ცხოვრების გარკვეულ ეტაპებზე მამაკაცებზე მეტი კალციუმი სჭირდებათ.

ორსულობისა და ლაქტაციის პერიოდში ეს მინერალი აუცილებელია როგორც დედის ორგანიზმისთვის, ისე ბავშვის ძვლოვანი სტრუქტურის ფორმირებისთვის. 

პრე, მენო და პოსტმენოპაუზის პერიოდში კალციუმის მიღება კიდევ უფრო მნიშვნელოვანია, რადგან სასქესო ჰორმონების დონის შემცირება იწვევს ძვლის სიმკვრივის კლებას და ოსტეოპოროზის რისკის ზრდას.

ჩვენი რჩევა: შეინარჩუნეთ ორგანიზმში D ვიტამინის საკმარისი რაოდენობა. ის ხელს უწყობს კალციუმს უკეთ ათვისებას და ძვლების ჯანმრთელობას. 
მზის სხივები D ვიტამინის ბუნებრივი წყაროა, თუმცა შემოდგომისა და ზამთრის პერიოდში ორგანიზმის მიერ მისი გამომუშავება ხშირად არასაკმარისია, ამიტომ საჭირო ხდება მისი დამატებით მიღება.